எதற்காக ?

சித்தர்களின் நிலையாமை பாடல்கள் சாயலில் ஒரு புதுக்கவிதை

 

காற்றில் கரைந்துபோகும்

      கண்காணா ஆவிக்கு ,

சோற்றுப் பொதிதான்

      கூண்டாவது ஏனோ ?

 

நெருப்பு ,விறகோடு 

      நாறும் உடல் தின்ன ,

பருத்த உடலை

     வளர்த்தது ஏனோ ?

 

ஆறடி தன்னில்

    அடங்கிவிடும் அற்பத்திற்கு ,

நூறுகொடி பறக்கும்

     மதில் கோட்டை ஏனோ ?

 

நிரந்தரமாய் உறங்கிவிடும்

     நீள் நெடு பயணத்தில் ,

நித்தம் நித்தம் ஓருறக்கம் 

    நிகழ்வதுதான் ஏனோ ?

 

உள்ளங்கையில் அள்ளும்அளவும்

   உடன்கொண்டு போவதில்லை ,

கொள்ளைகொண்டு பெருஞ்செல்வம்

   குவிப்பதுதான்  ஏனோ ?

 

கூற்றுவன் கயிறு வந்து

    குரல்வளை நெருக்கும் ,

காற்றை விலைக்கு விற்று மானுடம்

     பிழைப்பதுதான் ஏனோ ?

மாயாத மானிடர்

      மண்ணிலில்லை ,தெரிந்தும்

ஓயாத ஆணவம்

      ஒழிந்தபாடில்லை  ஏனோ ?.